ကလေးတွေကို စာမသင်ဘဲ ကျောင်းခန်းထဲမှာ ဖြစ်ချင်တိုင်း ဖြစ်နေတဲ့ စကစကျောင်းဆရာမ

ယနေ့ အွန်လိုင်းပေါ်မှာ ပျံ့နှံ့နေတဲ့ ဗီဒီယိုဖိုင်ကတော့ စကစ ကျောင်းခန်းထဲမှာ တစ်တော့ဆော့နေတဲ့ ဆရာမ တဦးရဲ့ ဗီဒီယိုဖိုင်ပဲ ဖြစ်ပါတယ်။

ဗီဒီယိုထဲမှာတော့ မူလတန်းကလေးတွေ ရှိတဲ့ စာသင်ခန်းထဲမှာ ကျောင်းစိမ်းဝတ်စုံ အပြည့်အစုံဝတ်ထားတဲ့ ဆရာမ တယောက်ဟာ အဆိုတော် ရွှေရည်ဖြိုးမောင်ရဲ့ ကိုယ်ရံတော် သီချင်းအလိုက်နဲ့ အညီ ခန္ဓာကိုယ်ကို လှုပ်ရမ်းပြီး ကခုန်နေတဲ့ ပုံရိပ်တွေ ပါဝင်ပါတယ်။ နောက်က မူလတန်းကလေးတွေကလည်း တစ်တော့ ကစားနေတာကို သိပြီး လိုက်ကြည့်နေတာကို တွေ့ရပါတယ်။

မလိုလားအပ်တဲ့ ပြဿနာတွေ ကျောင်းသူကျောင်းသားတွေ ကြားမှာ ဖြစ်ပေါ်လာမှာ စိုးတာကြောင့် ကျောင်းခန်းထဲကို လက်ကိုင်ဖုန်း ယူခွင့်မပေးထားပါဘူး။ အဲဒီစည်းမျဉ်းဟာ မြန်မာပြည်မှာ လက်ကိုင်ဖုန်းများ တွင်ကျယ်စွာ အသုံးပြုခဲ့တဲ့ လွန်ခဲ့တဲ့ ၁၀ နှစ်ဝန်းကျင်ကတည်းက ချမှတ်ခဲ့တာ ဖြစ်ပါတယ်။

ကျောင်းသူကျောင်းသားတွေ လက်ကိုင်ဖုန်း ကိုင်တာ တွေ့ခဲ့ရင်လည်း ဆရာမတွေက ခေတ္တသိမ်းဆည်းထားပြီး ကျောင်းဆင်းမှသာ ပြန်ပေးလေ့ ရှိပါတယ်။ ဒါပေမယ့် အာဏာသိမ်းပြီးနောက်ပိုင်း စကစကျောင်းတွေ ပြန်ဖွင့်တဲ့ အချိန်မှာ ကျောင်းခန်းထဲမှာ တစ်တော့ ကစားကြတဲ့ ဗီဒီယိုဖိုင် အများအပြား အွန်လိုင်းပေါ် ရောက်ရှိလာပါတယ်။

ကျောင်းသူ ကျောင်းသားတွေသာမက စည်းကမ်းထိန်းသိမ်းရမယ့် ဆရာမတွေ ကိုယ်တိုင်ပါ စိတ်ပါလက်ပါ ကစားနေကြတာကို တွေ့လာရပါတယ်။ ထို့အပြင် ကျောင်းတွင်း ရန်ပွဲ ဗီဒီယိုများကိုလည်း ဖုန်းအကောင်းစားတွေနဲ့ ကြည်လင်ပြတ်သားစွာ ရိုက်ကူးနေကြတာကိုလည်း တွေ့လာရပါတယ်။

ဒီနေရာမှာ မေးခွန်း (၂) ခုပေါ်လာပါတယ်။ စကစ ဖွင့်တဲ့ကျောင်းတွေရဲ့ စာသင်ခန်းတွေထဲမှာ လက်ကိုင်ဖုန်းတွေကို လွတ်လွတ်လပ်လပ် သုံးလို့ ရနေပြီလားဆိုတဲ့ မေးခွန်းရယ်၊ စကစကျောင်းတွေမှာ စာမသင်ဘဲ ကလေးတွေ ငြိမ်ရင် ပြီးရောဆိုပြီး လွှတ်ထားတာလားဆိုတဲ့ မေးခွန်းတွေပဲ ဖြစ်ပါတယ်။

သေချာတာကတော့ စကစကျောင်းတွေမှာ ဆရာအင်အား မလုံလောက်ဘဲ ဖြစ်နေပြီး ရှိတဲ့ ဆရာ၊ ဆရာမတွေကလည်း စာသင်ဖို့ စိတ်မဝင်စားဘဲ တစ်တော့ပဲ ဆော့နေကြတဲ့ပုံပါပဲ။ တစ်တော့ မဆော့နိုင်တဲ့ ဆရာမတွေကတော့ ကျူရှင် သင်ဖို့ပဲ အာရုံစိုက်နေကြတယ်လို့ ခန့်မှန်း မိရပါတယ်။ စကစ ကျောင်းတက်နေတဲ့ ကလေးတွေရဲ့ အနာဂတ်ကတော့ ရင်လေးစရာ အလွန်ကောင်းနေပါတော့တယ်။

Leave a Reply

Your email address will not be published.

x

You cannot copy content of this page