ရန်ကုန်တမြို့လုံး ဂျိုးဖြူရေ ပြတ်တောက်မှု (၂၄) နာရီကြာသည်အထိ အကြောင်းရင်း မသိရသေး

လက်ရှိအချိန်မှာ ရန်ကုန်မြို့ကို အဓိက ရေပေးဝေလျက် ရှိတဲ့ ဂျိုးဖြူရေပိုက်လိုင်းမှ ရေပေးဝေမှု ပြတ်တောက်လျက် ရှိပြီး ဂျိုးဖြူရေကို သုံးစွဲနေကြတဲ့ ရန်ကုန်နေ ပြည်သူတွေ ဒုက္ခရောက်နေကြတယ်လို့ သိရပါတယ်။

ဂျိုးဖြူရေပေးဝေမှုဟာ ယမန်နေ့ (၂၁-၁-၂၀၂၃) ညနေ ၆ နာရီဝန်းကျင်မှာ ပြတ်တောက်သွားခဲ့တာ ဖြစ်ပါတယ်။ ရေပေးဝေမှု ပြတ်တောက်ရတဲ့ အကြောင်းရင်းကို ရန်ကုန်မြို့တော်စည်ပင်က ယခုထက်ထိ ထုတ်ပြန်ကြေညာခြင်း မရှိသေးဘူးလို့ သိရပါတယ်။

“ရေပြတ်ပြီဆိုမှတော့ အထပ်မြင့်တိုက်မှာ နေတဲ့သူ အကုန် ဒုက္ခရောက်တာပေါ့။ အထပ်မြင့်တွေက ရေလှောင်တဲ့ ပမာဏ နည်းတယ်လေ။ ရေမလာတော့ အပေါ့အလေးက အစ ဒုက္ခရောက်တာပေါ့” ဟု လှိုင်မြို့နယ်မှာ နေထိုင်တဲ့ ပြည်သူတဦးက ပြောပါတယ်။

လက်ရှိအချိန်မှာ ဂျိုးဖြူရေကို မှီခိုနေရတဲ့ ရန်ကုန်မြို့နယ်က ပြည်သူအများအပြား ရေဘေးဒုက္ခသည် ဖြစ်လျက်ရှိပြီး အထပ်မြင့်နေ ပြည်သူများအတွက် ပရဟိတအသင်းတွေကနေ ရေကားတွေနဲ့ အခမဲ့ လိုက်လံဖြန့်ဝေနေတယ်လို့ သိရပါတယ်။

ရေစည်လှည်း ရောင်းတဲ့သူတွေအနေနဲ့လည်း ဈေးနှုန်းမြှင့်ပြီး ရောင်းချနေတယ်လို့ သိရပါတယ်။ ရန်ကုန်မြို့တွင်း ရေဖြန့် ဝေနေတဲ့ ဂျိုးဖြူရေပိုက်လိုင်းကို ၁၉၃၇ ခုနှစ်က စတင်တည်ဆောက်ခဲ့ပြီး ၁၉၄၀ ပြည့်နှစ်တွင် စတင်အသုံးပြုခဲ့ရာ ယခုအခါ နှစ်ပေါင်း ၈၀ ကျော် ကြာမြင့်နေပြီ ဖြစ်ပါတယ်။ ဂျိုးဖြူရေပိုက်လိုင်းမှ တနေ့လျှင် ရေဂါလန် ၂၀၅ သန်းထိ ဖြန့်ဝေပေးလျက်ရှိကြောင်း သိရပါတယ်။

Leave a Reply

Your email address will not be published. Required fields are marked *

x

You cannot copy content of this page