ဒီမိုကရေစီကို ပေါက်လွှတ်ပဲစားပြောမယ့် လူကြီးမင်း၊ နေ့လည်စာ ဒံပေါက်နဲ့ ကယ်တင်ရှင် ရှာကီရာ

ကယ်တင်ရှင် ရှာကီရာ

သင်တန်းသို့ လူကြီးမင်းရောက်လာမည်ဆိုသဖြင့် ပျာယာခတ်နေကြသည်။ ကောင်းသည့် အချက်ကတော့ ယနေ့ နေ့လယ်စာ ဒံပေါက်ဖြစ်ခြင်း၊ မကောင်းသည့်အချက်ကတော့ ထိုလူကြီးမင်း၏ မိန့်ခွန်းကို နားထောင် ရမည်ဆိုခြင်း။

ပိုဆိုးသည်က လူကြီးမင်းသည် သင်တန်းသားများနှင့်အတူ ဒံပေါက်ကို ထမင်းစားဆောင် အတွင်း၌ အတူ စားသောက်ပြီးမှ ကြုံတုန်းဆုံခိုက် ဟောပြောပို့ချမည်ဆိုခြင်း။ နေ့ ၁၂ နာရီ တစ်ချက် လောက်တွင် မည်မျှ အိပ်ငိုက်လိုက်ပါမည်နည်း။ ထမင်းစားပြီးနောက် ခန်းမထဲတွင် နေရာယူကြသည်။

“လူကြီးမင်း ကြွလာပါပြီခင်ဗျား” အားလုံးမတ်တတ်ထလိုက်ကြသည်။ သူ့အတွက် သတ်မှတ်ထားသော နေရာတွင် ဦးစွာထိုင်သည်။ ထို့နောက် အခမ်းအနားမှူးက အစီအစဉ်ကိုကြောညာသည်။ ထိုအချိန်ကတည်းက သင်တန်းသားတွေ ငိုက်စပြုပြီ။ ကျောင်းအုပ်ကြီးက အဖွင့်အမှာစကားပြောသည်။ သင်တန်းသားတွေ ခေါင်းစိုက်နေပြီ။

“ယခုအချိန်ကစပြီး လူကြီးမင်းက ဒီမိုကရေစီ၏ အနှစ်သာရအကြောင်း ဟောပြောပို့ချတော့မည်ဖြစ်ပါသည်။ ဟောပြောပို့ချပေးပါရန် ပန်ကြားအပ်ပါသည်” လက်ခုပ်သံကြောင့် လန့်နိုးလာကြသည်။ လူကြီးမင်းက စကားပြော စင်မြင့်တွင် နေရာယူသည်။ မျက်မှန်ကို တပ်သည်။

“အဟမ်း” ဖြင့်စသည်။ “ကြွရောက်လာကြတဲ့ ဆရာ ဆရာမများကို ကျွန်တော် ဒီနေ့ပို့ချမယ့် အကြောင်းအရာကတော့ ဒီမိုကရေစီရဲ့ အနှစ်သာရ ဖြစ်ပါတယ်” “ဒီမိုကရေစီဆိုတာဘာလဲ … အနှစ်ကို ပြောရရင်တော့” သူက လက်ပြလိုက်ရာ သူ့နောက်မှာ ဆလိုက်ကားချပ်ပေါ်တွင် ဗီဒီယိုကလစ် တစ်ခုတက်လာသည်။ ပေါ်လာသည့် အရာမှာ Shakira (ရှာကီရာ) က လက်အုပ်လေးချီထားသည်။ ထိုအချိန်အထိ မကသေး။

လူကြီးမင်းက နောက်ကို လှည့်မကြည့် မင်မောင်းကောင်းကောင်းဖြင့် ဘိုလို ပြောချလိုက်သည်မှာ Democracy is Off the people, Buy the people, Far the people. “ဒါဟာ ဒီမိုကရေစီရဲ့ အနှစ်သာရပါပဲ” သူ့ဟန်နှင့် သူ့အသံထွက်ကတော့အကိုက်

သူက လက်ဖြင့် အချက်ပြလိုက်သည်။ ဆက်ဆိုသည့်သဘော၊ ရှာကီရာက ယခုမှကသည် Waka Waka (This time for Africa) သီချင်းနှင့် လက်အုပ်လေးချီကာ ပျော်ရွှင်စွာ ကနေသည်။ သင်တန်းသားတွေက လက်ခုပ်တီးကြသည်။

ထိုအချိန်မှ သူက နောက်ကိုလှည့်ကြည့်သည်။ “ဟာ … ဘာကြီးလဲကွ … မှားနေတယ် အဲဒါမဟုတ်ဘူး” ကွန်ပျူတာဖြင့် ထိန်းချုပ်ပေးနေသူကိုအော်သည်။ ရှေ့တန်းက အားလုံး ပြူးပျာပြီး ကွန်ပျူတာကိုင်နေသူထံ ကျောင်းအုပ်ကြီးကပြေးသည်။

သင်တန်းသားတွေကား ကြိတ်ပြီးမရယ်နိုင်သဖြင့် အသံကပွင့်ထွက်လာသည်။ ယခုမှ အိပ်ချင်စိတ်တွေ ပျောက်ကုန်သည်။ လူကြီးမင်းက စင်ပေါ်မှ ဆင်းသွားသည်။ ကွန်ပျူတာသမားကို သွားဆူသည်။ ထို့နောက် စင်ပေါ်ပြန်တက် လာသည်။

“ဆောရီးပါ … ပါဝါပွိုင့်ဖိုင်ကို မှားထည့်လာမိလို့ပါ” လူကြီးမင်းက ဆက်ပြီးပို့ချမည်ထင်သည်။ သို့သော် “အဟမ်း … ဒေတာတွေက ကွန်ပျူတာ ပါဝါပွိုင့်နဲ့ လုပ်လာတယ် … တကယ်ပို့ချမလို့ပါပဲ … ဒါပေမဲ့ … ဟိုလေ … ဒါပေမဲ့ … ဒေတာတွေက ပါမလာဘူးဆိုတော့ကာ … ဟိုလေ … ဘယ်လိုပြောရမလဲ”

သူက စကားမဆက်နိုင်တော့ “အဟမ်း … ဒီမိုကရေစီရဲ့ အနှစ်သာရဆိုတာ ဟိုလေ ဘယ်လိုပြောရမလဲဆိုတော့ … အော့ဖ်သည် ပြူးပြဲ … ဘိုင်းသည်ပြူးပြဲ … ဖားသည် ပြူးပြဲ … အဲ … အဲ …” ထိုအချိန်တွင် ဗီဒီယိုက ထပ်ပေါ်လာပြန်သည်။

“ဆာမီနာ မီနာ … အား အား၊ ဝါကာ ဝါကာ အား အား၊ ဆာမီနာ မီနာ ဇန်ဂလီဝါ၊ သစ်တိုင်းဖော် အာဖရိက” သင်တန်းသားတွေက လက်ခုပ်လိုက်တီးကြသည်။ လူကြီးမင်းက စိတ်တိုကာ “ဟေ့ … တော်တော့ … တော်တော့ အဲဒါကို ဖွင့်မနေနဲ့တော့” ဟုပြောကာ စင်မြင့်ပေါ်မှ ဆင်းပြီး ခန်းမထဲက ထွက်သွားသည်။ လူကြီးမင်းနောက်မှ လူသေးမွှားတွေက လိုက်သွားကြသည်။

အခမ်းအနားမှူးက ကြေညာသည် “ယခုအချိန်ကစပြီး ဒီမိုကရေစီ၏ အနှစ်သာရ ဟောပြောပွဲ အောင်မြင်စွာ ပြီးဆုံးကြောင်း ကြေညာအပ်ပါသည်” ဟုဆိုသည်။ ထိုအချိန်တွင် အသံချဲ့စက်က ရှာကီရာ၏ သီချင်းကို ဖွင့်သည်။

“ဆာမီနာ မီနာ … အား အား၊ ဝါကာ ဝါကာ အား အား၊ ဆာမီနာ မီနာ ဇန်ဂလီဝါ၊ သစ်တိုင်းဖော် အာဖရိက” သင်တန်းသားတွေက ကွန်ပျူတာကိုင်သော ဆရာထံပြေးကာ ဝိုင်းဖက်ပြီး လေထဲမြှောက်ကြသည်။

“မောင်မင်းကြီးသား သက်တော်ရာကျော် ရှည်ပါစေ” ဟု ချီးကျူးဂုဏ်ပြုကြသည်။ အားလုံးကိစ္စများပြီးသည့်အခါ ကွန်ပျူတာ ကိုင်ပေးရသော ဆရာ ဉာဏ်လင်းထွန်းကို မေးသည်။ သူနှင့် ကျွန်တော်က ခုတင်ချင်းကပ်လျက်။ ဉာဏ်လင်းထွန်းကား ကျောင်းဆရာထဲတွင် ရှားရှားပါးပါး ကွန်ပျူတာ ကျွမ်းကျင်သည့်ငနဲ။

“ဟေ့ကောင် … လူကြီးမင်းပြောမယ့် ပါဝါပွိုင့်က တကယ်ပဲ မှားသွားတာလား” “သိဘူးလေ … သူတို့ပေးထားတဲ့ စတစ်ထဲကဟာကိုပဲ ဖွင့်ပေးလိုက်တာ” “ဉာဏ်လင်းထွန်း … ငါသိတယ်နော်”

ထိုနေ့ကစပြီး ဉာဏ်လင်းထွန်းကို သင်တန်းသားများက ရှာကီရာဟုသာ ခေါ်ကြလေတော့သည်။ ဒီမိုကရေစီကို ပေါက်လွှတ်ပဲစားပြောမည့် လူကြီးမင်းလက်မှ လွတ်မြောက်အောင် လုပ်ပေးသော မမေ့စရာ ရှာကီရာကိုလည်း သတိရမိပါသည်။

(မိတ်ဆွေကျောင်းဆရာတစ်ဦး၏ ပြောပြချက်ကို ပြန်လည်သရုပ်ဖော်ရေးသားခြင်းဖြစ်ပါသည်)

တင်ညွန့်
၂၂.၁.၂၀၂၂

Leave a Reply

Your email address will not be published. Required fields are marked *

x

You cannot copy content of this page