မီတာဆောင်ချင်လွန်းတဲ့သူတွေ လတ်တလော ကြုံတွေ့နေရတဲ့ ဒုက္ခ (တာဝန်ယူမှု တာဝန်ခံမှု ဘယ်မှာလဲ)

မီတာသွားဆောင်တဲ့ သူတွေ လတ်တလာ ကြုံတွေ့နေရတဲ့ ဒုက္ခကတော့ အတော်ကြီးမားပါတယ်။ မီတာခ သွားဆောင်တဲ့ ငွေတွေကို မီတာရုံးက ယူထားလိုက်ပြီး ကြွေးကျန်စာရွက်တွေ ထပ်ရောက်လာတဲ့ ပြဿနာ ဖြစ်ပါတယ်။

တောင်ဥက္ကလာမှာ မီတာသွားဆောင်သူ တဦးတင်ထားတဲ့ အဖြစ်အပျက်ကို အောက်မှာ ဖော်ပြ လိုက်ပါတယ်-

“နိုဝင်ဘာလ ၁၅ ရက်နေ့က မီတာခကျသင့်ငွေ ကျပ် ၄၂၂၂၀၀ ကျော်ကို တောင်ဥက္ကလာပမီတာရုံးသို့ သွားဆောင်ရာ ဂိတ်ပေါက်တွင် အတွင်းသို့ ဝင်မရဟု တားမြစ်ပြီး ဂိတ်ပေါက်တွင် တာဝန်ရှိသူဟုပြောပြီး မီတာစာရွက်နှင့်ကျသင့်ငွေကို ရုံးတွင်းသို့ယူသွားပါသည်။

ငွေသွင်းပြီးကြောင်းကို ပုံပါအတိုင်းလက်မှတ်ထိုး ဆောင်ရွက်ပေးပါသည်။ ထိုဆောင်ထားသောလများအတွက် ကြွေးကျန်ဟုဆိုကာ မီတာစာရွက်ထပ်လာ၍ သွားရောက်ရှင်းလင်းပါသည်။

တာဝန်ရှိသူ မည်သူကမှ ရှင်းလင်းပေးခြင်း မရှိပါ။ မီတာဆောင်ရာတွင် ဂရုပြုနိုင်ပါရန် တင်လိုက်ရပါတယ်။”

အထက်ပါ ဖြစ်စဉ်အရ မီတာခငွေများကို လက်ခံသူနဲ့ မီတာစာရွက်ထုတ်သူတို့အကြား ချိတ်ဆက်မှု လွဲချော်နေသည်မှာ အထင်အရှား ဖြစ်ပါတယ်။

အဲဒါဆို အခုဆောင်နေတဲ့ မီတာခတွေကရော တကယ်ဆောင်နေတာ ဟုတ်ရဲ့လား ဆိုတဲ့ မေးခွန်း ပေါ်လာပါတယ်။ ရုံးရှေ့က လူက ယူသွားပြီး လက်ရေးနဲ့ ရေးပေးလိုက်တဲ့ စာရွက်က အကျုံးဝင်ရဲ့လား၊ အရင်လို လက်ခံ ဖြတ်ပိုင်းနဲ့ မလုပ်တော့ဘူးလား၊ ဆောင်ပြီးကာမှ ဘာလို့ အကြွေးကျန် ဆိုပြီး ထပ်ရောက်လာတာလဲ

မဖြေရှင်းနိုင်တဲ့ မေးခွန်းများစွာ ကျန်ရှိနေပါတယ်။ ဒီမေးခွန်းတွေကို ဘယ်သူဖြေကြမှာလဲ၊ တာဝန်ယူမှုရော၊ တာဝန်ခံမှုရော ဘယ်သူတွေ လုပ်ကြမှာလဲ။ လောလောဆယ်တော့ ပြည်သူတွေရဲ့ ပိုက်ဆံကတော့ စာရင်းမရှိ အင်းမရှိတဲ့ မီတာခ ကောက်တဲ့သူတွေ လက်ထဲမှာ ရေစုန်မျောတဲ့ အဖြစ်ကို ရောက်နေပါပြီ။

Leave a Reply

Your email address will not be published. Required fields are marked *

x

You cannot copy content of this page