(၄၈) နာရီအတွင်း ဘင်္ဂလားပင်လယ်အော်မှ မုန်တိုင်းဖြစ်မည် (ရေကြီးရေလျှံမှုများ အထူးဂရုပြုကြပါ)

ဘင်္ဂလားပင်လယ်အော် အနောက်မြောက်ပိုင်း နဲ့ ဆက်စပ်နေတဲ့ ဘင်္ဂလားပင်လယ်အော် အနောက်အလယ်ပိုင်းမှာ ဖြစ်ပေါ်နေတဲ့ အားကောင်းတဲ့ လေဖိအားနည်းရပ်ဝန်းဟာ (၄၈) နာရီအတွင်း မုန်တိုင်းငယ်အဖြစ်ကို ရောက်ရှိနိုင် တယ်လို့ မိုးလေဝသနှင့် ဇလဗေဒညွှန်ကြားမှု ဦးစီးဌာနက ထုတ်ပြန်လိုက်ပါတယ်။

ဩဂုတ်(၈)ရက် မြန်မာစံတော်ချိန် မနက်(၅)နာရီခွဲအချိန် တိုင်းထွာရရှိတဲ့အဖြေကို မနက်(၁၀)နာရီမှာထုတ်ပြန်လိုက်တာပါ။ အဲဒီအားကောင်းတဲ့ လေဖိအားနည်းရပ်ဝန်းဟာ မုန်တိုင်းငယ်အဖြစ်ကို ရောက်ရှိပြီးနောက် အိန္ဒိယနိုင်ငံ၊ ဩရိဿ ပြည်နယ် အနီးကနေ ဖြတ်ကျော်ဝင်ရောက်နိုင်တယ်လို့ ခန့်မှန်းရကြောင်းလည်း ထုတ်ပြန်ချက်မှာ ဖော်ပြထား ပါတယ်။ အဲဒီအပြင် ကပ္ပလီပင်လယ်ပြင် နဲ့ ဘင်္ဂလားပင်လယ်အော်တို့မှာ မုတ်သုံလေ အားကောင်းရာမှ အားအ လွန်ကောင်းနေတယ်လို့လည်း ထုတ်ပြန်ချက်အရ သိရပါတယ်။

ရှမ်းပြည်နယ်၊ တောင်ကြီးမြို့မှာ သြဂုတ် ၆ ရက်ညနေပိုင်းမှစတင်၍ မိုးသည်းထန်စွာရွာသွန်းမှုကြောင့် လူနေရပ်ကွက်များအတွင်းနှင့်လမ်းများပေါ်တွင် ရေများဝင်ရောက်လျက်ရှိကြောင်း လူမှုကူညီရေးအသင်းများမှ သိရပါတယ်။

ရေဝင်ရောက်ရာတွင် ရေစီးဆင်းမှုများလည်းဖြစ်ပေါ်ခဲ့သဖြင့် ခြံစည်းရိုးအုတ်တံတိုင်းအချို့မှာလည်း ပြိုကျပျက်စီးခဲ့ပြီး ခိုင်ခန့်မှုအားနည်းသည့် နေအိမ်အချို့လည်း ပျက်စီးမှုများဖြစ်ပေါ်ခဲ့တယ်လို့ သိရပါတယ်။ ထိုသို့ ရေဝင်ရောက်မှုဖြစ်ပွားနေသည့် နေအိမ်များတွင် နေထိုင်သူများအား မီးသတ်တပ်ဖွဲ့ဝင်များနှင့်လူမှုကူညီရေးအသင်းများမှ ဘေးလွတ်ရာသို့ယာယီရွှေ့ပြောင်းပေးခဲ့ကြကြောင်း သိရပါတယ်။

ယခုနှစ် မိုးများတဲ့ ကာလမှာ ပြင်ဦးလွင်နဲ့ တောင်ကြီးလို တောင်ပေါ်မြို့တွေမှာ ထူးထူးခြားခြား ရေကြီးရေလျှံ ဖြစ်လာတာကို တွေ့ရှိလာရပါတယ်။ အမှိုက်များကို စနစ်တကျ မစွန့်ပစ်ခြင်း၊ သစ်တောများကို ပြုန်းတီးလာခြင်းနဲ့ ရေဝေရေလဲ ဧရိယာများ လျော့နည်းလာခြင်းတို့ကြောင့် တောင်ပေါ်ဒေသတွေမှာ ရေကြီးမှုတွေ ဖြစ်လာနိုင်ကြောင်း ပညာရှင်များက မှတ်ချက် ပြုထားပါတယ်။

Leave a Reply

Your email address will not be published.

x

You cannot copy content of this page