ကမ္ဘာပေါ်မှာ အမေရိကန်ဒေါ်လာကို လူတိုင်းက လိုချင်ရတဲ့အကြောင်းရင်း (ယွမ်နဲ့ ရူဘယ်ကိုရော)

အဘယ်ကြောင့် အမေရိကန်အတိုးနှုန်းဟာ စီးပွါးရေးသော့ချက် ဖြစ်နေရတာလဲ။ အမေရိကန်ဗဟိုဘဏ်ရဲ့အတိုးနှုန်း ဆုံးဖြတ်ချက်ဟာ တကမ္ဘာလုံး စောင့်ကြည့်နေရတဲ့ အရေးကြီးဆုံးဖြတ်ချက်ဖြစ်ပါတယ်။ အမေရိကန်စီးပွါးရေးဟာ ကမ္ဘာ့စီးပွါးရေး GDP ရဲ့ ၂၈ ရာခိုင်နှုန်း နီးပါးပတ်သက်နေတာဖြစ်ပါတယ်။

ဒါတောင် ၁၉၆၀ ဝန်းကျင် ရွှေနဲ့ဒေါ်လာ တအောင်စ ၃၅ ဒေါ်လာ သတ်မှတ်ထားတုန်းက ၄၀ ရာခိုင်နှုန်းနီးပါး ပတ်သက်နေပါတယ်။ ဘာလို့ဒီလောက် အားကြီးခဲ့တာလည်းဆိုတော့ ကမ္ဘာစစ်ကြီးနှစ်ခုမှာ အင်ပါယာနိုင်ငံတွေ ချွတ်ခြုံကျ မွဲခဲ့ကျပြီး၊ နေမဝင်အင်ပါယာကြီးတောင် ဒုတိယကမ္ဘာစစ်မှာ ဂျာမနီကို စစ်ရှုံးလုအံ့အံ့မှာ၊

သမ္မတရူစဗဲ့ကို အသည်းအသန် စည်းရုံးတဲ့အထဲမှာ အမေရိကန်သည်းခြေကြိုက် ပေါင်စတာလင်နေရာမှာ ဒေါ်လာအစားထိုး ခွင့်ပြုမယ်ဆိုတဲ့ အချက်တချက်ကိုပါ ပေးအပ်ခဲ့လို့ပါပဲ။ တကမ္ဘာလုံးက ရွှေတွေနဲ့ ဒေါ်လာတွေ လဲပေးခဲ့ရပါတယ်။ အမေရိကန်ဒေါ်လာ နန်းစတက်တဲ့ အချိန်ပဲ ဖြစ်ပါတယ်။

၁၉၈၀ ဝန်းကျင်နောက်ပိုင်းကနေ ကမ္ဘာ့စီးပွါးရေးကို အပြိုင်အဆိုင်ဝင်ရောက်လာတဲ့ နိုင်ငံတွေကြောင့် အမေရိကန်ဒေါ်လာကို ကုန်သွယ်ရေးမှာ သုံးတာလျော့ချဖို့ အပြိုင်အဆိုင် ကြိုးစားခဲ့ကြပါတယ်။ အနီးဆုံးဥပမာက ယူရိုငွေပါပဲ။

စီးပွါးရေးဆိုဒ်အားဖြင့်တူညီတဲ့ ဥရောပဟာ တိုးတက်မှု မညီမျှတဲ့နိုင်ငံတွေ စုပေါင်းထားတာကြောင့် ယခုအချိန်အထိ ပြသနာမပြေလည်သေးပါ။ ဂရိတို့ အီတလီတို့ဟာ ဂျာမနီ၊ ပြင်သစ်တို့လောက် စီးပွါးရေး မလည်ပတ် နိုင်ကြပါ။ ဥရောပ ယူရိုဟာ နိုင်ငံတွေရဲ့ ဗဟိုဘဏ်တွေမှာ ၁၈% လောက်သာ အရံငွေကြေးအနေနဲ့ထားရှိပါတယ်။

နောက်ထပ် ထွန်းသစ်စ တရုတ်စီးပွါးရေးဟာ ကမ္ဘာ့ GDP ရဲ့ ၁၆ ရာခိုင်နှုန်း ပါဝင်ပေမယ့် အများစုဟာ အမေရိကန်ကို ပို့ရတဲ့ထုတ်ကုန်တွေပါ။ နိုင်ငံတွေရဲ့ အရန်ငွေကြေးမှာ ၂ ရာခိုင်နှုန်းခန့်သာ သိမ်းဆည်းကျပါတယ်။ ဒါဆို ဒေါ်လာကို အစားထိုးသုံးမယ်ပြောတာ တချို့နေရာတွေမှာ ဖြစ်နိုင်မဖြစ်နိုင် သေချာစဉ်းစားကြည့်ဖို့ပါပဲ။

ကုန်သွယ်ရေးကို အခြေခံထားပြီး စီးပွါးရေး အားကောင်းမောင်းသန်ဖြစ်မှုအပေါ်မှာ ငွေကြေးတိုက်ရိုက်ဖလှယ်သုံးစွဲလို့ရပေမယ့် အဲ့အခြေခံအကြောင်းတွေ မတည်ဆောက်ထားရင် တချို့ကိစ္စတွေက အလုပ်ခက်နေဦးမှာပါပဲ။ ဗမာစကားပုံတခုလိုပြောရရင် ဝရှိမှ ဝိလုပ်လို့ရမည်လို့သာဆိုချင်ပါတယ်ဗျာ (သူဌေးဆြာလေးအောင်ကောင်းမြတ်)

Leave a Reply

Your email address will not be published. Required fields are marked *

x

You cannot copy content of this page