ညဖက် လူခြေတိတ်မှ ကြားရတဲ့ အသံ တသံရဲ့ ထူးခြားမှု နောက်ကွယ်မှ အကြောင်း

ဒီညတော့ ခြောက်ခြားစရာအဆောက်အဦးကြီးတွေအကြောင်း မပြောတော့ပါဘူး။ အဝေးကိုခေါ်မသွားတော့ဘူး။

စေတနာနဲ့ အနီးအနားကကိစ္စပဲပြောပြပါမယ်။ အမယ် … စေတနာနဲ့တဲ့ … အားကြီးနဲ့။ စင်ကာပူမှာနေတဲ့သူတွေ ညညဆိုကိုယ့်အပေါ်ထပ်ကြမ်းပြင်က တစ်ခုခုပြုတ်ကျသံကြားဖူးလား?

အထူးသဖြင့် … တောက်… တောက် … တောက် … တောက် … နဲ့ တစ်ခုခုလိမ့်ဆင်းသွားတာမျိုး။ တခါတလေတွေးတော့တွေးမိသား ဒီအချိန်ကြီးအပေါ်ထပ်ကလူတွေ ဘာလုပ်နေလို့ ပြုတ်ကျပါလိမ့်လို့။

အစက ကျနော်လည်းမသိဘူး။ ဟိုနေ့ကမစ်ရှဲပြောလို့။ သူ HDB မှာ သရဲအခြောက်ခံရဖူးတယ်တဲ့။ သူကတော့ သူကြုံဖူးတဲ့အကြောင်းကို ကျနော်တို့နဲ့ ဟန်နီတို့ အိအိတို့ကို ပုံမှန်အတိုင်းပြောပြတာ။ ကျနော်တို့ကလည်း ဒီအတိုင်း နားထောင်လိုက်တာ။ သူတကယ်ကြုံခဲ့ရတာတော့ သေချာမှန်းသိတယ်။

မစ်ရှဲ Bukit Gombak မှာနေတုန်းက ညညဆို အပေါ်ထပ်ကနေ ကလေးအံစာတုံးပစ်ချသံကြားရသတဲ့။ ခဏခဏကြားရတာနဲ့ တနေ့တော့မေးမယ်ဆိုပြီး အပေါ်တက်သွားတော့အပေါ်ထပ်အိမ်က ကလေးမရှိတဲ့အိမ်တဲ့။

အဲ့နေ့ကတော့ကျနော်တို့လည်း ဒီလိုပဲနားထောင်ခဲ့တာပေါ့။ မစ်ရှဲဆိုတာလည်း တကယ်ကြုံရတာပဲပြောတတ်တဲ့သူ။

တနေ့ကမှဒီကိစ္စဟာ အတော်များများ ကြုံရတဲ့ ပြဿနာမှန်းသိရတယ်။ အခုမှသိရတာက ဖန်ဂေါ်လီကျတဲ့အသံတဲ့။ မစ်ရှဲထင်နေတဲ့ အံစာတုံးလိမ့်သံမဟုတ်ဘူး။ အသံကဆင်တာကိုး။

စင်ကာပူမှာ ကျနော်တို့နေတဲ့ Hougang ရပ်ကွက်မှာ မနှစ်ကလူတစ်ယောက်က အဲ့ဒီကိစ္စနဲ့ပတ်သက်ပြီး ရဲကိုအကြိမ် (၈၀) ဖုန်းဆက်ပြီး တိုင်ခဲ့သတဲ့။ နောက်ပြီး လွှတ်တော်အမတ် Tan Chuan-Jin က ဒီကိစ္စဟာ လူတွေကွန်ပလိန်းအတက်ဆုံးကိစ္ စတစ်ခုဖြစ်ကြောင်း ပြောပြခဲ့ဖူးတယ်။ သတင်းတွေမှာဖတ်ရတာ။

အခုမှ မစ်ရှဲတစ်ယောက်တည်း ကြုံရတာ မဟုတ်မှန်းသိရတာ။ သူ့ကိုတောင် ပြန်မပြောရသေးဘူး။ Joseph Wong ဆိုသူပြောပြတာက Lorong Ah Soo မှာ (၁၅) နှစ်နေတုန်းက ညညဆို အပေါ်ထပ်က ခုံရွှေ့သံနဲ့ အဲ့လိုတစ်ခုခုပစ်ချသံ တောက်တောက်နဲ့ကြားဖူးသတဲ့။

အခု Punggol 21 ကိုပြောင်းတော့လည်း အဲ့အသံက လိုက်လာတုန်းပဲတဲ့။ အဲ့ဒါနဲ့ အပေါ်ထပ်တက်သွားတော့ အဖွားကြီးလင်မယားနဲ့ အိမ်အကူပဲရှိသတဲ့။ ဖန်ဂေါ်လီဆော့မယ့် ကလေးလုံးဝမရှိဘူးတဲ့။

မလေးတစ်ယောက် ပြောပြတာက အဲ့ဒါ Toyol တဲ့ တိုရိုးလို့ အသံထွက်မယ် ထင်တယ်။ Toyol ဆိုတာ မလေး legend မှာကလေးပုံဖန်တီးပြီးနေတတ်တဲ့ ကလေးသရဲတဲ့။ အဲ့ဒီကလေးသရဲဟာ ဖန်ဂေါ်လီဆော့ရတာကြိုက်သတဲ့။

Punggol Waterway’s website မှာလည်း အဲ့ဒီညညဂေါ်လီလုံးပြုတ်ကျသံအကြောင် းရေးထားတာရှိတယ်။

ကျနော်လည်း မနေ့ကည အိပ်ခါနီးမှတွေးမိတာ။ ဟုတ်သား။ ကျနော်လည်း အဲ့ဒီ တောက် … တောက် … တောက်နဲ့ ဖန်ဂေါ်လီလိုဟာမျိုး လိမ့်သွားသံ ညညကြားဖူးတယ်။ မြန်မာပြည်မှာတုန်းက မကြားဖူးဘူး။

အစက ညသန်းခေါင်အပေါ်ထပ်ကြမ်းပြင်က ဒေါက်ကနဲကြားရရင် ခဲတံဖြစ်ဖြစ် ပြုတ်ကျတယ်ထင်နေတာ။ မနေ့ကမှ အဲ့အကြောင်းဖတ်ပြီး ပြန်စဉ်းစားမိတယ်။ ခဲတံဆို ဒေါက်ကနဲကျပြီးပြီးသွားမှာပေါ့။ ဘာလို့ တောက်တောက်တောက်နဲ့ အသံကဆက်သွားတာလဲ? တွေးစရာပဲ။

ရေပိုက်က အသံတို့၊ ရေချိုးခန်း water trap ကအသံတို့ စသည်ဖြင့် ထင်ရာရှင်းပြထားတာတွေရှိတယ်။ ခက်တာက ဘယ်သူမှ အတိအကျမပြောနိုင်ဘူး။ ကျနော်တော့ပိုက်က အသံက အဲ့လိုအသံမျိုးထွက်မယ်လို့ မထင်ဘူး။ သီအိုရီကတော့အများကြီးပဲ။

မနေ့ညက မီးမှိတ်ပြီး အိပ်ခါနီးမှ သွားတွေးမိသေးတာ။ အခုနေဒေါက်ကနဲကြားရရင်လို့ တွေးမိတာ။ ည ၁၂ နာရီကလည်းကျော်နေပြီ။ အမှောင်ထဲကိုယ့်အပေါ်က မျက်နှာကြက်ကို ပြန်မော့ကြည့်မိသေးတယ်။ သေချာလည်းမော့မကြည့်ရဲဘူး။

Old wives’ tales အဖွားကြီးပုံပြင်တွေပဲပြောရမလား။ ပြောကြတာတော့ ဟိုတုန်းက HDB တိုက်ခန်းတွေဆောက်ရင် ကန်ထရိုက်တာတွေက ဖန်ဂေါ်လီလေးတွေကို ကြမ်းခင်းလောင်းရင် ထည့်တတ်သတဲ့။ ကလေးဆော့ဖို့တဲ့။

ကလေးသရဲတွေက လူနေအိမ်တွေမှာ ကိုယ်ထင်ပြ မခြောက်အောင် ထည့်ထားတာတဲ့။ အဲ့ဒီဂေါ်လီနဲ့ဆော့ဆိုတဲ့သဘော။ ဟုတ်မဟုတ်တော့မသိဘူး။

သေချာတာတော့ တောက်တောက်တောက် ညဘက်ကြားရရင် ကိုယ့်နားမှာတစ်ယောက်ယောက်၊ တစ်ခုခုရှိနေတာအမှန်ပဲ။

အပေါ်ထပ်မှာ လူရှိနေလို့ဖြစ်ဖြစ်၊ Toyol ရှိနေလို့ပဲဖြစ်ဖြစ် တစ်ခုခုပဲ။ ဒီညကြားရမလားနားထောင်ကြည့်ပေါ့။
တစ်ခုခု တောက်ကနဲကျသံကြားရရင် ပြန်ပြောအုံး။

Good night

Richard Myo Thant

Leave a Reply

Your email address will not be published.

x

You cannot copy content of this page