ဧရာမ စမူဆာကြီးနဲ့ အီကြာကွေးကြီးတွေရဲ့ ထူးခြားဆန်းကြယ်လွန်းလှတဲ့ ဖြစ်ရပ်

လက်ဘက်ရည် တငုံ ငုံပြီး စမူဆာ ပန်းကန်ကိုကြည့်လိုက်တော့ အလွန် အံ့ဩသွားသည်။ မိမိတစ်သက် ဤကဲ့သို့ ကြီးသော စမူဆာများကို မမြင်ဘူးပေ။ တစ်ခု ကုန်အောင်စားဖို့ပင် မည်သို့မျှ မဖြစ်နိူင်​။

လက်ဘက်ရည်ဆိုင်မှာ အတူထိုင်နေတဲ့တပည့်ကို “စမူဆာ တစ်ခု ဘယ်လောက်လဲ.. ” မေးတော့ သူက ကိုယ်ပြောတာ မကြား။ နောက်ဆုံးတော့ မိမိ အနားကို တိုးကပ်ပြီးနားစိုက်ထောင်သည်။ ” ​လေးရာ ဆရာ..” တဲ့။ အရမ်း အံ့ဩသွားသည်။ ဒီလောက် အကြီးကြီးကို လေးရာထဲပေးရတယ်။

“အီကြာကွေ့ရော” ” ဗျာ ဆရာ” ဒီကောင် အရင်က ဒီလိုမဟုတ်။ဘယ်အချိန်က နားပင်းသွားသလဲမသိ။ ဒေါသထွက်ထွက်နဲ့ သိမ်းကြုံးအော်လိုက်သည်။ တပည့်ဖြစ်သူက ပြုံးလျက် ” လေးရာပဲ ဆရာ တဲ့။ ” ကော်ပြန့်လိပ်ကရော” “လေးရာပဲ ဆရာ” ” အရင်ကလည်းလေးရာ အခုလည်း လေးရာ..စျေးမတတ်ပါဘူးကွ…ပြီးတော့ အကြီးကြီးတွေ..ဒီလောက်ကြီးမှတော့…ဆိုင်ရှင်တော့ ရှုံးမှာ သေ​ခြာတယ်ကွ..” တပည့်က မိမိကို ကြည့်ပြီး ပြုံးနေလေသည်။

တန်ချက်ကဗျာ။ တစ်ခုကို နှစ်ခါ သုံးခါ စားရင်တောင် ကုန်ဘို့ မလွယ်ဘူး။ ဗိုက်ကလည်း မဆာတော့ ခွက်ထဲက လဘက်ရည်ပဲ ကုန်အောင်သောက်လိုက်တယ်။ ” ပြန်မယ်ကွာ…” မိမိက ပြန်ရန်ပြောသဖြင့် တပည့်ကြီးက ပြန်ရန်ပြင်ဆင်သည်။ မိမိ သောက်သော လဘက်ရည် ပန်းကန်ခွက် နှင့် ရေနွေးခွက်တွေကို သူ့ အိပ်ထဲထည့်​လေသည်။ ” ဟေ့ကောင် ဆိုင်က ပန်ကန်တွေ ခိုးမလို့လား” အော်ပြောလိုက်သည်။ ဒီကောင်က ဒီနေ့ နားအလွန် ကန်းနေသည်။

“မဟုတ်ပါဘူး ဆရာရယ်။ ဒီခွက်တွေ ပန်းကန်​တွေ ထိုင်ခုံတွေက ဆရာ့ အဆင်ပြေအောင် ဆရာ့အတွက် သီးသန့်လုပ်ထားတာတွေပါ” ” ကျွန်တော့် လက်ပေါ် တက်ပါဆရာ” “ဘုရားဘုရား ဒီကောင့်လက်ဖဝါးက အကြီးကြီး။ လက်ပေါ်တက်လိုက်တော့ တပည့်ဖြစ်သူက မိမိကို အသာလေးမပြီး ​လှောင်အိမ်ပုံစံတစ်ခုထဲသို့ ထည့်လိုက်လေသည်။

တပည့်က မိမိအတွက် အလွန်ကြီးမားသော စမူဆာ များကို သူ့အတွက် တစ်ခုခြင်းစားဘို့ မဖြစ်နိူင်သကဲ့သို့ စာမူဆာအားလုံးကို လက်နှစ်ချောင်းနှင့် အသာညှပ်ပြီး ပါးစပ်ထဲ တပြိုင်ထဲ ထည့်လိုက်လေသည်။

မိမိသည် စာရေးဆရာ ဂျိုနသန်စွစ် ရဲ့ ”ဂါလီဘာ ” ထဲက ဇာတ်ကောင်လေးလို သေးသေးလေး ဘဝဖြင့် လှောင်အိမ်ထဲ ရောက်နေမှန်း အခုမှ သတိပြုမိသည်။ နေ့စဉ် ဝယ်စားနေကြ အစားအသောက်များ အရမ်း ကြီး​နေရခြင်း အကြောင်းရင်းကို အခုမှ နားလည်လေသည်။ (ဒီခေတ် စားသောက်ကုန် စျေးနှုန်း များနှင့်ဆိုလျင် ကျွန်တော်တို့အားလုံး လီလီပွတ်တို့ တိုင်းပြည်ထဲက လူသေးသေးလေးတွေဖြစ်မှ ဝဝလင်လင် စားရမည်ဖြစ်သည်…ဟုတွေးပြီး အိပ်ပျော်သွားခဲ့ခြင်း ဖြစ်သည်။) Saya U Khin Zaw

Leave a Reply

Your email address will not be published.

x

You cannot copy content of this page