ဒေါ်လာဈေး ၂၉၀၀ ရောက်ရှိ (အရောင်းအဝယ်များ ရပ်ဆိုင်း၊ ဒေါ်လာဈေးကွက် ပြိုလဲသွားပါပြီ)

ဗဟိုဘဏ်က နိုင်ငံခြားငွေ ဒေါ်လာဈေးနှုန်းကို (၁၈၅၀) ကျပ်ဖြင့် အရောင်းအဝယ် ပြုလုပ်ရန် ညွှန်ကြားထားပေမယ့်လည်း ယနေ့ ဇူလိုင်လ (၂၈) ရက် မွန်းလွဲပိုင်း ပြင်ပဈေးကွက်တွင် (၂၆၀၀) ကျပ် မှ (၂၉၀၀) ကျပ် ဝန်းကျင်အထိ ဈေး ပေါက်နေကြောင်း ဒေါ်လာ အရောင်းအဝယ် ပြုလုပ်သူ အချို့ထံမှ သိရပါတယ်။

ဗဟိုဘဏ်ရဲ့ ဒေါ်လာကိုင်ဆောင်ခွင့်နှင့် ပတ်သက်သည့် ကန့်သတ်ချက်များကြောင့် ပြီးခဲ့သည့် ရက်ပိုင်းအတွင်း ဒေါ်လာဈေးနှုန်းများ တစ်စတစ်စ မြင့်တက်လာရာမှ ယခု ဈေးနှုန်းအထိ မြင့်တက်လာ ခြင်း ဖြစ်ပါတယ်။ ရန်ကုန်မြို့လယ်ရှိ ငွေလဲကောင်တာ တစ်ခုတွင် ယနေ့ ဇူ လိုင်လ (၂၈) ရက် မွန်းလွဲ (၃) နာရီဝန်းကျင် ရောင်းဈေးအနေဖြင့် အမေရိကန် (၁) ဒေါ်လာလျှင် မြန်‌မာငွေ ၂၆၅၀ ကျပ်ဖြင့် ရောင်း၀ယ်နေကြောင်း အဆိုပါ ငွေလဲကောင်တာမှ တာဝန်ရှိသူ တစ်ဦးက ပြောပါတယ်။

လက်ရှိပေါက်ဈေးအရ ဈေးကွက်အတွင်း ဝယ်လိုအားပေါ် မူတည်ပြီး ‌ဈေးနှုန်းကွာဟမှုများရှိနေပြီး အချို့နေ ရာများတွင် အမေရိကန် (၁) ဒေါ်လာလျင် မြန်မာငွေ (၂၉၀၀) ဝန်းကျင်အထိ ပေးဝယ်နေရကြောင်းနှင့် လိုသလောက် ဝယ်ယူ၍ မရရှိကြောင်း ကမာရွတ်မြို့နယ်အတွင်း နေထိုင်သည့် စီးပွားရေး လုပ်ငန်းရှင် တစ်ဦးက ပြောပါတယ်။

“တစ်နေရာနဲ့ တစ်နေရာ ဈေးကွာတာရှိတယ်။ ပါးစပ်ဈေးတွေဖြစ်နေတာပါပဲ။ ကျွန်တော်တို့ ဒီမနက်ဝယ်ဈေးက ၂၉၀၀ နှုန်းနဲ့ ဝယ်ရတယ် ။ မနေ့က ၂၈၀၀ ။ ဒါတောင် လိုသလောက်မရဘူး။ တချို့တွေ မရောင်းတော့ဘူး” ဟု အဆိုပါ စီးပွားရေး လုပ်ငန်းရှင်က ပြောပါတယ်။

လက်ရှိတွင် ဈေးကွက်အတွင်း ဒေါ်လာဈေး အဆမတန် မြင့်တက်နေသော်လည်း နိုင်ငံခြားငွေ မဖြစ်မနေ အသုံး ပြုရမည့် လုပ်ငန်းလုပ်ကိုင်သူများအနေဖြင့် မဖြစ်မနေ ဝယ်ယူနေရကြောင်းလည်း ၎င်းက ပြောပါတယ်။ “မဝယ်ရင် လုပ်ငန်း ရပ်လိုက်ဖို့ပဲ ရှိတာလေ ။ အဲဒီတော့ လိုတော့လည်း ဝယ်နေရ‌တာပေါ့” ဟု ‌၎င်းက ပြောပါတယ်။

ဗဟိုဘဏ်က ၁၈၅၀ ကျပ်ဖြင့် အရောင်းအဝယ် ပြုလုပ်ရန် ဈေးနှုန်းသတ်မှတ်ပေးထားသော်လည်း မည်သည့်ငွေလဲကောင်တာနှင့် ဘဏ်များတွင်မှ အဆိုပါ ဈေးနှုန်းအတိုင်း ရောင်းချပေးခြင်း မရှိဘဲ ဈေးတင် ရောင်းချခြင်းများ၊ ဈေးကစားသူများ၏ ဈေးကစားခြင်းများကြောင့် ယခုလို ဒေါ်လာဈေးနှုန်း အဆမတန် မြင့်တက်လာနေခြင်းဖြစ်ကြောင်းလည်း သိရပါတယ်။

၂၀၂၁ ခုနှစ် စက်တင်ဘာလမှာ ဒေါ်လာဈေး ၃၅၀၀ အထိအမြင့်ဆုံး ရောက်ရှိခဲ့ပြီးနောက် ဈေးကွက်တခုလုံး ရပ်ဆိုင်းသွားခဲ့ဖူးပါတယ်။ ယင်းအချိန်က စီးပွားရေး ပြိုလဲမှု ယခုလောက် မသိသာသေးဘဲ ယခုအချိန်မှာတော့ စီးပွားရေး ပြိုလဲမှု သိသာနေတာကြောင့် ဒေါ်လာဈေးကွက် လုံးဝ ပြိုလဲသွားပြီလို့ မှတ်ယူနိုင်ကြောင်း လုပ်ငန်းရှင်တဦးက ပြောပါတယ်။

Leave a Reply

Your email address will not be published.

x

You cannot copy content of this page