ထပ်တရာနဲ့ ပလာတာ အခေါ်အဝေါ် ကွဲလွဲခြင်းအတွက် အကောင်းဆုံး ဖြေရှင်းချက်တခု

ထပ်တရာနဲ့ ပလာတာကိစ္စ ပြောချင်လို့ပါ။ ကျနော်က မြန်မာနိုင်ငံ အလယ်ပိုင်းက မြို့တစ်မြို့ကပါ။ ကျနော်တို့မြို့မှာ ကြက်ဥပလာတာ၊ ပဲပလာတာနဲ့ သကြားပလာတာဆိုပြီးဘဲ ရှိပါတယ်။

သကြားပလာတာက အလွှာလေးတွေနဲ့ အခုပြောနေကြတဲ့အညာဒေသ အခေါ် ထပ်တရာပါ။ ပဲပလာတာက ပဲထည့်ပြီး လေးထောင့်ပုံခေါက်ကြော်ထားတာပါ။ ကြက်ဥပလာတာလဲ လေးထောင့်ပါ။ ကျနော်က ပခုက္ကူဒေသရော၊ မန်းလေးဒေသ၊ နေပြည်တော်၊ မိတ္ထီလာ ရောက်ဖူးပါတယ်။ အဲဒီဒေသတွေမှာ ထပ်တရာလို့ ပြောမှသိပါတယ်။

သရက် အောင်လံ ပြည်ကစလို့ ရန်ကုန်ထိ ထပ်တရာ မခေါ်ပါဘူး။ ပလာတာ တချပ်လို့မေးရင် သကြားပလာတာလား၊ ပဲပလာတာလား၊ ကြက်ဥပလာတာလား ပြန်မေးပါလိမ့်မယ်။ ထပ်တရာဆို မသိဘူး​ပြောပါလိမ့်မယ်။

အထက်ပိုင်းမှာ ထပ်တရာကို သကြားရော ပဲရော ထည့်ပေးပေမယ့် ကျနော်တို့ဆီမှာ သကြားနဲ့ပဲစားပါတယ်။ပခုက္ကူမှာရောက်တုန်း ထပ်တရာမှာပြီး ပဲမထည့်နဲ့ တကူးတက ပြောရပါတယ်။ စားနေမကျလို့ပါ။ ဥပမာ နာမည်ကြီး ပြည်ပလာတာဆို သကြားပလာတာကို သုပ်တာပါ။ ထပ်တရာသုပ် မခေါ်ဘူး။ ကျနော်တို့ဆီမှာ ပလာတာသုပ် လို့ဘဲခေါ်ပါတယ်။

မြန်မာပြည်အလယ်ပိုင်း ဆင်ပေါင်ဝဲမြို့နဲ့ အထက်ပိုင်း ရောက်တဲ့ မကွေး မင်းဘူး နေပြည်တော် တောင်တွင်းကြီး ကစလို့ အပေါ်ပိုင်း က ထပ်တရာလို့ခေါ်တာ စိစစ်တွေ့ရှိရပါတယ်။ သရက်အောင်လံပြည် ကနေ အောက်ပိုင်းကို ပလာတာခေါ် တာတွေ့ရတယ်။

ဂူးဂဲ မှာ ရှာကြည့်တော့ paratha လို့ရှာရင် လက်ရှိ အညာအခေါ် ထပ်တရာပုံတွေ ထွက်တာလာတွေ့ရပါတယ်။ 100 layers paratha လို့ရိုက်ရှာရင်လဲ ထပ်တရာပုံတွေဘဲ တွေ့ရတယ်။ နိုင်ငံတကာ အသုံးက paratha (ပလာတာ) ပါဘဲ။ ပလာတာခေါ်တဲ့ မြို့တွေကိုကြည့်လိုက်ရင် အင်္ဂလိပ်လက်အောက် မြန်မြန်ကျရောက်ခဲ့တဲ့ မြို့တွေ ဖြစ်နေတာတွေ့ရပါတယ်။ ၁၈၅၃ ဒုတိယအင်္ဂလိပ်မြန်မာစစ်ပွဲအပြီး အောက်မြန်မာပြည်အသိမ်းခံခဲ့ ရတယ်။ အဲဒီလိုစောစောစီးစီး နေမဝင်ဗြိတိန်အင်ပါယာထဲသွင်းခံရတဲ့ မြို့တွေက ပလာတာ ခေါ်ကြတာပဲ။

၁၈၈၆ သီပေါမင်းပါတော်မူမှ နေမဝင် အင်ပါယာအောက်ရောက်တဲ့ မြို့တွေက ထပ်တရာ ခေါ်ကြတာ။ လွတ်လပ်ရေး မရခင်ထိ အိန္ဒိယနွယ်ဖွားတွေ မြန်မာပြည်အောက်ပိုင်းမှာ အရမ်းများတဲ့အတွက် သူတို့ခေါ်တာပဲ လွှမ်းမိုးရတာပါ။ အညာဒေသကတော့ အထပ်ထပ်တွေများလို့ ထပ်တရာလို့ မြန်မာမှုပြုထားပုံရပါတယ်။ (မူရင်းရေးသားသူအား လေးစားမှုဖြင့် – bkr)