ဦးနေဝင်းက လေယာဉ်ပျံနဲ့ ခေါ်ပြီး ကြော်ခိုင်းရတဲ့ မိတ္ထီလာ ပေါက်ချောင်းဘူးသီးကြော်အကြောင်း

ပေါက်ချောင်းကြော်၊ ပေါက်ချောင်း ကြော်ဆိုလို့ဘာများမှတ်တယ်။ ဘူးသီးကြော်တွေပါလားတဲ့ ပြောကြတယ်။ အစဉ်အလာကြီးတဲ့ မြို့ထီလာက ဦးအေးမောင်ရဲ့ ဘူးသီးကြော်ပါ။

ပေါက်ချောင်းစျေးထိပ်မှာ မူလက ကုက္ကိုပင် ကြီး တပင်ရှိတယ်။ အဲဒီအပင်ရဲ့ အနောက်ဖက် မနီးမဝေးမှာ အကြော်ဆိုင်ရှိတယ်။ မနက်စာကို ပေါက်ချောင်းဘူးသီးကြော်နဲ့ ရေမုန့်စားရတာ အင်မတန်လိုက်ဖက်ပါတယ်။

ရေမုန့်က ရန်ကုန်က ရေမုန့်လို အကျွတ်မဟုတ်ဘူး။ ကြက်သွန်မိတ်၊ ပဲပြုတ်နဲ့ ဖြူဖွေး အိစက်နေပြီး အဝတ်လိုတောင် ခေါက်လို့ရတယ်။ ဂျပန်ခေတ်က မိတ္ထီလာမှာ ဗိုလ်ချုပ်အောင်ဆန်း တရားဟောတယ်။ ကုက္ကိုပင်ကြီးအောက်မှာ ရပ်မိရပ်ဖများက အဲဒီအကြော်ဆိုင်က အကြော်နဲ့ ဧည့်ခံတယ်။ ပန်းကန်နဲ့ မဟုတ်၊ အင်ဖက်လေးနဲ့ပါတဲ့။

လက်ကြားဆီယိုအောင် ကြွရွစားကောင်းတဲ့ အကြော်ဟာ “ပေါက်ချောင်းကြော်”ဆိုပြီး နာမည်စကြီးခဲ့တယ်။ ပေါက်ချောင်း​ဘူးသီးကြော်ဆိုတာ ဘူးသီးအချောင်းလေးတွေ လုပ်ပြီး တစ်ခုချင်း မုန့်နှစ်ထဲ နှစ်ကြော်တာမဟုတ်ဘူး။

မူလပေါက်ချောင်းကြော်ဆိုတာ မိုးဗြဲဒယ်ကြီးထဲ ဆီများများနဲ့ မုန့်နှစ်နဲ့ ဘူးသီးတွေကို ဒယ်ကြီးနဲ့အပြည့်အချပ်လိုက်ကြီးကြော်တာ။ အကြော်ရလို့ ဆီစစ်ထားပြီး ဝယ်တဲ့တန်ဖိုးအလိုက် အကြော်ကို ဖဲ့ပြီးရောင်းတာလို့ မိတ္ထီလာ ပေါက်ချောင်းသားစစ်စစ် ကျွန်မရဲ့ ခင်ပွန်းသည်က ပြောပြဖူးတယ်။

ပေါက်ချောင်းဘူးသီးကြော်နဲ့ ရေမုန့်နာမည်ကြီးလိုက်ပုံများ ဦးနေဝင်းလက်ထက်မှာ လေယာဉ်နဲ့ခေါ်ပြီးအကြော်ဆရာ ရေမုန့်လုပ်သူရယ် ဒယ်အိုးအပါအဝင် ပစ္စည်း ကရိယာ ကိုယ့်ဟာနဲ့ ကိုယ်ယူသွားရတယ်။ လက်ခသီးသန့် ပစ္စည်းဖိုး သီးသန့်ရှင်းပေးတယ်။

အခုဆို မျိုးဆက် ၃ ဆက်ရှိခဲ့ပြီ။ ပထမ မူလသူတို့အဖွား လက်ထက်က သုံးခဲ့တဲ့ဒယ်အိုးပြတ်ကို ခုထိသုံးတုန်းတဲ့။ ဆိုင်နေရာတော့ ပြောင်းသွားပြီ။ သမိုင်းဝင် ကုက္ကိုပင် တွေလည်းမရှိတော့ဘူး။ ဒါပေမယ့်ပေါက်ချောင်းကြော်ကစားလို့ကောင်းတုန်းပဲ။ (Dolly Tin)

Leave a Reply

Your email address will not be published. Required fields are marked *

x

You cannot copy content of this page