နေအတုနဲ့ လအတုကို အောင်မြင်စွာ တီထွင် ဖန်တီးနိုင်တော့မယ့် တရုတ်နိုင်ငံ
နေအတု နှင့် လအတု ဖန်တီးမည့် တရုတ်နိုင်ငံ
Artificial ကို မြန်မာလို “အတု” လို့ ဘာသာ ပြန်ဆိုကြပေမဲ့.. Artifact ကိုတော့ “လက်လုပ်ပစ္စည်း” (တနည်း) “လူလုပ်ပစ္စည်း” လို့ အဓိပ္ပါယ်ဖွင့်ဆိုကြပါတယ်။ တရုတ်နိုင်ငံမှာ ယခုဆိုလျှင်ဖြင့် နေ နဲ့ လ ကို အတု (တနည်း) နည်းပညာဖြင့် ဖန်တီး ရယူနိုင်နေပြီ ဖြစ်ပါတယ်။
လအတုဆိုတာ တကယ့် လ အရွယ်အစားလောက်ကြီး လ အတုကို ဆိုလိုခြင်းမဟုတ်ပါ။ သံလိုက်စက်ကွင်းကို အသုံးချပြီး မြေဆွဲအားကို လျော့ပါးအောင် ပြုလုပ်ထားတဲ့ နည်းပညာဖြစ်ပါတယ်။ အရွယ်အစားအားဖြင့် နှစ်ပေသာသာ အကျယ်လောက်ရှိတဲ့ လေဟာနယ် အခန်းတစ်ခုထဲမှာ မြေဆွဲအားမရှိအောင် ဖန်တီးလုပ်ယူ ထားပါတယ်။
ထိုအခန်းထဲကို ကျောက်သားများထည့်သွင်းပြီး လ မျက်နှာပြင်နဲ့ တူအောင် ပြင်ဆင်ထားမှာဖြစ်ပါတယ်။ ရည်ရွယ်ချက်ကတော့.. မြေဆွဲအားနည်းတဲ့ လ မျက်နှာပြင် မှာ စမ်းသပ်မှုတွေ မပြုလုပ်ခင်.. ကြိုတင်လေ့လာတွေ့ရှိချက်တွေ စမ်းသပ်နိုင်ရန်ဖြစ်ပါတယ်။ မကြာမီမှာ လကမ္ဘာကို လူသားတို့ ခြေချနေထိုင်နိုင်ကြတော့မှာပါ။
နေအတုအတွက်ကိုတော့.. တရုတ်၊ အမေရိကန်၊ ရုရှား၊ ဂျပန် နဲ့ တောင်ကိုးရီးယားမှ ပညာရှင်များစုပေါင်းကာ ဒေါ်လာ ၁ ထရီလီယံ ရင်းနှီးမြှုပ်နှံပြီး တီထွင်ဖန်တီးနေကြတာ ဖြစ်ပါတယ်။ ပလာစမာ အဏုမြူဓါတ်ပေါင်းဖိုကြီးနဲ့ နေထက် ငါးဆလောက်ပူပြင်းတဲ့ အပူစွမ်းအင်ကို ၁၇ မိနစ်ကြာ ရယူနိုင်နေပါပြီ။ လက်ရှိသုံးစွဲနေကြတဲ့ နယူကလီးယား ဓါတ်ပေါင်းဖိုများနေရာမှာ ပိုမိုသန့်စင်တဲ့ နေ စွမ်းအင်ကို အစားထိုး သုံးစွဲလာနိုင်ဖို့ ရည်ရွယ်ထားပါတယ်။ (ပုံ)
နေဟာ ဟိုက်ဒရိုဂျင် နဲ့ ဟီလီယံတို့ နယူကလိယ ဓါတ်ပြုပေါက်ကွဲနေတဲ့ ဓါတ်ငွေ့ဘောလုံးကြီးဖြစ်ပါတယ်။ အဆိုပါဓါတ်ပြုခြင်းမှ ထွက်လာတဲ့ အပူ နဲ့ အလင်းစွမ်းအင်ကို ကမ္ဘာအပါအဝင် ဂြိုဟ်တွေက အသုံးပြု (မှီခို) ကြရပါတယ်။
နေ အတုဟာ ကျနော်တို့ရဲ့ မိခင် နေ ရဲ့ နေရာကို အစားထိုးမှာ မဟုတ်ပဲ သန့်စင်တဲ့ (တနည်း) ဖန်လုံအိမ်ဓါတ်ငွေ့ စွန့်ထုတ်မှု နည်းပါးတဲ့ စွမ်းအင်ရင်းမြစ်တစ်ခု ဖြစ်လာရန်သာ ရည်ရွယ်ပါတယ်။ အနာဂတ်ကမ္ဘာကြီး ရေရှည်တည်တံ့ပြီး သာယာလှပဖို့ တိုးတက်လာတဲ့ အသိပညာ အတတ်ပညာတို့နဲ့ လူသားတို့ ကြိုးစားပြင်ဆင်သွားရမှာပဲ ဖြစ်ပါတော့တယ်။
အနာဂတ်ပညာရေးအတွက်..
သန့်ဦး (အာကာသနှင့် စကြဝဠာ သင်ထောက်ကူ)
