နေ့တိုင်းစံချိန်တင် တက်နေတဲ့ မြန်မာ့ရွှေဈေး ဘယ်လောက်ထိ တက်နိုင်မလဲဆိုတဲ့ အဖြေ

ရွှေဈေးအကြောင်း လာလာမေးကြလို့ ပါ့ပလစ်ပို့စ် နဲ့ပဲ ကျွန်တော် ဖြေပေးလိုက်ပါတယ်။ ကမ္ဘာ့ရွှေဈေးက နည်းပညာ သဘောတရား နှစ်ခုအရပြောမယ်ဆိုရင်

(၁) အကျပိုင်း ရောက်နေတဲ့ အနေအထား (Descending Channel) ကို ချိုးဖောက်နိုင် (Breakout) ထားပြီလို့ ယူဆနိုင်ပါတယ်။ အဲဒီအတွက် ကမ္ဘာ့ရွှေဈေးဟာ ဒေါ်လာ ၁၈၀၀ အထက်ကို ခိုင်ခိုင်မာမာ ရပ်တည်သွားရင် ကာလလတ်လောက်မှာ ဒေါ်လာ ၁၈၈၀ ကို ပြေးပါလိမ့်မယ်။ ကမ္ဘာ့စီးပွားရေး ကျဆင်းမှုနဲ့ ထိုင်ဝမ်အရေးတို့ကြောင့် ကမ္ဘာ့ရွှေဟာ အတက်ဘက် ပြန်ယိမ်းလာတာပါ။

(၂) နောက်နည်းပညာ သဘောတရားတစ်ခု ဖြစ်တဲ့ EMA သဘောတရား အရကြည့်ရင် ၂၀၂၂ ဧပြီလောက်မှာ စခဲ့တဲ့ ကမ္ဘာ့ရွှေအကျ ဟာ ၂၀၂၂ ခုနှစ် ဩဂုတ် လဆန်းမှာပဲ အတက်ပြမှု (Bullish Crossover) ဖြစ်ပြီး ပြီးဆုံးခဲ့တာ တွေ့ရပါတယ်။

အဲဒီအတွက် ခြုံငုံပြောရရင် ကမ္ဘာ့ရွှေဟာ အတက်ဘက်ကို အားယူနေတယ်လို့ ပြောရပါတော့မယ်။ ပုံမှန်ဆို ကမ္ဘာ့ရွှေတက်ရင် ဒေါ်လာကျပါတယ်။ ရွှေနဲ့ ဒေါ်လာဟာ ပြောင်းပြန်ပါ။ ဒါပေမယ့် ပြည်တွင်းဈေးကွက်မှာ ရွှေရော၊ ဒေါ်လာ နှစ်မျိုးလုံးက ဝယ်လိုအား အရမ်းများနေပါတယ်။

နောက်တစ်ခုက ဗဟိုဘဏ်နှုန်း ၁၈၅၀ ကနေ ၂၁၀၀ တင်လိုက်တဲ့ အတွက် ဒေါ်လာဈေး ပိုမာလာသလို ဆက်လည်း မာနေဖို့ပဲ ရှိပါတယ်။ ဒါက ပြည်တွင်းဈေးကွက် ကြောင့်ပါ။ ဒါကြောင့် ကမ္ဘာ့ရွှေဈေးသာ ဒေါ်လာ ၁၈၈၀ ရောက်ခဲ့ရင် အနာဂတ် ပြည်တွင်းရွှေ ဘယ်လောက်ဖြစ်လာနိုင်သလဲ ဆိုတာ ဆဝါးကြည့်ချင်သူတွေ အတွက် ကမ္ဘာ့ရွှေဈေး ကို ၁.၈၇၅ နဲ့စား ဒေါ်လာဈေးနဲ့မြှောက် ပြီးတွက်လို့ရပါတယ်။

ဥပမာ ~ 1,880/ 1.875 x 2,650 = 2,657,000 ဆိုရင် ၂၇ သိန်း လောက် ရောက်နိုင်တာတွေ့ရပါမယ်။ ဒေါ်လာဈေးကတော့ ဘိုင်းနန့်က ဈေးကို ပျမ်းမျှ ယူထားတာ ဖြစ်ပါတယ်။ ဒေါ်လာဈေး အတက်အကျက ရွှေဈေးပေါ် အများကြီးရိုက်ခတ်ပါလိမ့်မယ်။

အဲဒီတော့ ဒေါ်လာဈေးမာ၊ ​ရွှေဝယ်လိုအားလည်း များနေတဲ့ ပြည်တွင်းဈေးကွက် အတွက် ကမ္ဘာ့ရွှေ ဒေါ်လာ ၁၈၈၀ နားချဉ်းကပ်လာချိန်မှာကို ဝယ်လိုအား (Demand) နဲ့ ခိုင်မာတဲ့ ပိုင်ဆိုင်မှု ပစ္စည်း အိမ်ခြံမြေ (Safe Haven Asset) ကြောင့် ကာလလတ်မှာ (၂၇) သိန်း လောက် ရောက်သွားခဲ့ရင်လည်း အံ့သြစရာ မရှိဘူးလို့ပဲ ဖြေချင်ပါတယ်။ ဒါက ပျမ်းမျှ ကြိုတင်တွက်ချက်မှုပါ၊ နေ့စဉ် အချက်အလက် ပေါင်းများစွာက ဒီတွက်ချက်မှုပေါ် အကျိုးသက်ရောက်မှု ရှိမှာ ဖြစ်ပါတယ်။ မျိုးအိမ်ဇန်၊ သြဂုတ်လ ၉ ရက်၊ ၂၀၂၂

Leave a Reply

Your email address will not be published.

x

You cannot copy content of this page