တဒေါ်လာ ၁၀၀၀ ပြန်ဖြစ်အောင် ငွေချေးလက်မှတ်တွေ ထုတ်ရောင်းမယ်လို့ စကစ ဗဟိုဘဏ် ထုတ်ပြန်

ဗဟိုဘဏ်ငွေချေးသက်သေခံလက်မှတ် (Central Bank Bill) ထုတ်ဝေရေး ဆောင်ရွက်သွားဖို့ အစီအစဉ်တွေ ရှိတယ်လို့ စကစ လက်အောက်ခံ ဗဟိုဘဏ်က ထုတ်ပြန်ပြောဆိုလိုက်ပါတယ်။

စကစ လက်အောက်ခံ ဗဟိုဘဏ်အနေနဲ့ စီးပွားရေးစနစ်အတွင်းက ပိုလျှံငွေကြေး (Excess Liquidity) ကို သွယ်ဝိုက်နုတ်သိမ်းခြင်းနဲ့ ငွေကြေးဖောင်းပွမှုနှုန်း မြင့်တက်ခြင်းကို အထိုက်အလျောက်ထိန်းချုပ်နိုင်ဖို့ ငွေချေးလက်မှတ်တွေကို ထုတ်ရောင်းဖို့ ရည်ရွယ်နေတာလို့ သိရပါတယ်။

ငွေချေးလက်မှတ် ထုတ်ဝေခြင်းက အတိုးစရိတ်အကုန်ကျခံကာ ငွေကြေးတည်ငြိမ်ရေးအတွက် ဆောင်ရွက်တာဖြစ်သလို လက်မှတ် ထုတ်ရောင်းခြင်းက ရရှိတဲ့ ငွေကြေးတွေကို အစိုးရစီမံကိန်းတွေနဲ့ တိုင်းပြည်ရဲ့ GDP တိုးတက်ရေးကို အထောက်အကူပြုမယ့် ကဏ္ဍတွေကို ဘဏ္ဍာငွေတွေ ပေးသွားဖို့ ဖြစ်တယ်လို့ စကစ လက်အောက်ခံ ဗဟိုဘဏ်က ပြောပါတယ်။

လက်ရှိမှာ ငွေတိုက်လက်မှတ်နဲ့ ငွေတိုက်စာချုပ်တွေကို ငွေတိုက်ဦးစီးဌာနက စီမံခန့်ခွဲကာ ဗဟိုဘဏ် (CBM) ကတဆင့် ရောင်းချမှုသာရှိနေပြီး (၃)လ၊ (၆)လ၊ (၁)နှစ်ကာလတို သက်တမ်းရှိသလို အမြင့်ဆုံး (၄)နှစ်သက်တမ်းရှိတဲ့ စာချုပ်တွေကိုလည်း ထုတ်ဝေလျက်ရှိပါတယ်။

စကစ လက်အောက်ခံ ဗဟိုဘဏ်ရဲ့ အဆိုအရ ငွေတိုက်စာချုပ်က အစိုးရဘတ်ဂျက်လိုငွေကို ယာယီဖြေရှင်းဖို့ ထုတ်ဝေတာဖြစ်ပြီး ဗဟိုဘဏ်က ထုတ်ဝေတဲ့ ငွေချေးလက်မှတ်တွေက ငွေကြေးပမာဏကို ထိန်းကျောင်းဖို့ (တိုးမြှင့်ခြင်း၊ လျှော့ချခြင်း) အတွက် လွတ်လပ်တဲ့ ဈေးကွက်ဆိုင်ရာ လုပ်ဆောင်ချက်တစ်ခုအနေနဲ့ ထုတ်ဝေကြတာလို့ သိရှိရပါတယ်။

တခါတရံ ဘတ်ဂျတ်လိုငွေဖြည့်ဆည်းဖို့ အစိုးရငွေချေးသက်သေခံလက်မှတ်တွေ ထုတ်ဝေမှုက မလုံလောက်ဘူးဆိုရင် ဗဟိုဘဏ်အနေနဲ့ ကိုယ်ပိုင်ငွေချေးသက်သေခံလက်မှတ်တွေ ထုတ်ဝေပြီး အစိုးရကို ပြန်လည်ထုတ်ချေးပေးခြင်းတွေ ဆောင်ရွက်တယ်လို့ ဆိုပါတယ်။

ထိုသို့ ကြေညာလိုက်တာကြောင့် စကစအနေနဲ့ ဘတ်ဂျက်လိုငွေပြမှု အများအပြား ကြုံတွေ့နေရပြီး ပိုက်ဆံတွေ လိုသလောက် ရိုက်ထုတ်ဖို့ ခက်ခဲနေတာ ဖြစ်နိုင်တယ်လို့ စီးပွားရေး ပညာရှင်တဦးက သုံးသပ်ပါတယ်။ ၂၀၂၁ ခုနှစ်တုန်းက စကစ အနေနဲ့ ငွေတိုက်စာချုပ် ရောင်းချခဲ့ပေမယ့်လည်း အောင်မြင်မှု မရှိခဲ့ပါဘူး။ ဗဟိုဘဏ်အပေါ် ပြည်သူတွေရဲ့ ယုံကြည်မှု တခုမှ မရှိတော့တာကြောင့် ယခု ငွေချေးလက်မှတ်တွေလည်း ရောင်းရမှာ မဟုတ်ဘူးလို့ စီးပွားရေး ပညာရှင်တွေက မှတ်ချက်ပေးနေကြပါတယ်။

Leave a Reply

Your email address will not be published. Required fields are marked *

x

You cannot copy content of this page